LAOAG CITY – Natay ti maysa a mannalon kalpasan a nagbekkel iti Barangay Poblacion 4, Pasuquin, Ilocos Norte.
Daytoy ti kinumpirmaran ni Police Master Sergeant Rowel Silvestre, ti chief investigator iti PNP-Pasuquin.
Binigbig na ti biktima a ni Isagani Balatico y Peralta, agtawen ti 39, awanan ti asawa, mannalon ken residente met laeng iti nadakamat a barangay.
Inbatad na nga iti imbestigasyon da, nakita ti agnagan Editha Calimbas ti biktima a nakabitin iti maysa a poon ti kayo iti likud ti balay na usar ti tali.
Naamoan nga iti panangeksamen ni Doctor Diophantos Acob iti Rural Health Unit (RHU) iti ili ti Pasuquin, addan tallo nga oras a natay ti biktima sakbay a nakita ni Calimbas.
Segun ken ni Silvestre, ti biktima ket agpaspasar ti depresyon ken agmaymaysan nga agbibiag.
