LAOAG CITY – Natiliw ti maysa a lalaki babaen ti naiyuswat a drug buy bust operation ti Philippine Drug Enforcement Agency (PDEA) ken PNP Pinili iti Brgy. Barbar iti nasao nga ili.
Nabigbig ti suspek a ni Roel Rosaro, agtawen ti 36, naasawaan, mannalon ken residente iti nasao a barangay.
Segun ken ni Mr. Chester Oandasan, Intel officer II ti PDEA natiliw ti suspek kalpasan a naglako ti maysa a sachet a naglaon ti maipagarup a shabu nga agbalor ti sangaribo a pisos iti maysa a PDEA personnel a nagpammarang a gumatang iti iligal a druga.
Nakumpiskar manipod iti suspek dagiti walo a sachet ti maatap a shabu, maysa ng empty plastic sachet, maysa a lighter, cellphone, karton ti sigarilyo ken 1000 peso bill a marked money.
Kabayatanna, kuna ni Oandasan nga addan ti dati a kaso ti suspek a panagsalungasing iti RA 9165 wenno Comprehensive Dangerous Drugs Act of 2002 ken isuna ti maika siyam iti regional target list ti PDEA.
Iti mainaig a damag, inpetteng ni Brgy. Kagawad Nestor Reyes iti Brgy. Barbar iti ili PInili a saan a maaramid ni Rosel Rosaro, ti subject ti drug buy bust operation iti nasao a barangay ti agikot iti ililag a druga.
Segun ken ni Reyes, nupay adda iti probation ni Rosaro gapu ta dati a drug surrenderee ket patien na a naminpinsan a nagbaliw daytoy.
Kuna na a daytoy ket gapu ta awan ti makita na a madi nga aramid ni Rosaro agsipod ta agtrabtrabaho iti pagtatalonan ken tumultulong kadagiti trabaho iti barangay.
Inbunannag ni Reyes a manipod idi adda iti probation ni Rosaro agingga itatta ket awan ti pannakainaig na a iligal nga aktibidad.
Kabayatanna, inpetteng ni Roel Rosaro, ti suspek iti naiyuswat a drug buybust operation iti Brgy. Barbar iti ili ti Pinili a saan na a kukua dagiti nakumpiskar a maipagarup a shabu kenkuana.
Inbatad na nga adda kuma laeng mapan na permaan iti Brgy. Salanap seknan iti probation na ngem awan ti naabutan na isut gapu na nagawid a dagus.
Nupay kasta, kuna ni Rosaro nga apaman ti panagawid na ket kellaat a sinada dagiti kameng ti PDEA iti rangtay sakbay ti arko iti Brgy. Barabar.
Kuna na a dita a kinapkapan dagiti otoridad ken innala da ti kaha ti sigarilyo na ken inkarga da dagiti maipagarup a shabu.
Inpetteng na a saan na nga inaramat ti gumatang iti mapapati a shabu manipod iti maysa a kameng ti PDEA a nagpammaranag a posuer buyer.
Inkalintegen na pay na a sipod natiliw idi 2016 gapu metlaeng iti panagikot na ti iligal a druga ket saanen a nagusar wenno naglako.
