LAOAG CITY – Naiget a naglikudan ni Atty. Manases “Mans” Carpio, asawa ni Vice President Sara Duterte, ti maipagarop a pannakairaman na iti P6.7 bilyon a bank transactions nga inreport ti Anti-Money Laundering Council (AMLC), ken inawagan na daytoy a “fake ken blatant lie.”
Segun iti abogado a ni Atty. Peter Paul Danao, maipagarop a misleading ti kantidad a naiparuk-at iti panagdengngeg ti kamara de representantes gapu ta daytoy ket pakabuklan ti balor laeng dagiti transaksyon ken saan a ti aktwal a kinabaknang.
Inlawlawag ti kampo ni Carpio a maipagarop a pinagtitipon laeng ti Anti-Money Laundering Council ti nagduduma a transaksyon isut gapuna nga immabot iti bilyon ti balor nga ibilang da kas “bloated” ken saan a ti pudno a financial standing na.
Nagballaag met dagiti abogado na iti possible a panaglabsing iti karbengan iti privacy ken due process, aglalo iti panangibutaktak kadagiti bank records a mabalin a mangitunda ti panagamak iti publiko ken industriya iti panagbangko.
Inpaganetget ti kampo ni Carpio a ti nasao nga addang ket mabalin a mangilukat ti risgo a precedent ken makadadael ti panagtalek ti umili iti sistema ti pinansyal ti pagilian.
