LAOAG CITY – Balligi a naarestar ti maysa a mannalon babaen ti Anti-Illegal Drug Buy-bust Operation iti ili ti Bacarra.
Segun ken ni P/Maj. Sheryl Guzman, pannakangiwat ti Ilocos Norte Police Provincial Office, nabigbig ti suspek a ni Marvie Lariana, agtawen 45, awanan asawa ken residente ti Barangay 30 Cadaratan iti ili ti Bacarra.
Inbatadna a natiliw ti suspek kalpasan a maipagarup a naglako daytoy ti maatap a shabu iti maysa a pulis a nagpammarang kas poseur-buyer nga agbalor ti maysa a ribu a pisos.
Inlawlawagna a malaksid iti daytoy ket nakumpiskar pay iti suspek ti pito nga heat sealed transparent plastic sachet a naglaon ti mapapati a shabu pakairamanan dagiti dadduma pay a drug paraphernalia.
Innayonna a ti naala a kontrabando iti suspek ket agbalor ti 13,600 a pisos ken maibilang kas Street Level Individual maibasar iti Drug Watchlist dagiti otoridad.
