LAOAG CITY – Balligi a naarestar ti maysa a mannalon babaen ti naiwayat nga Anti-Illegal Drug Buy-bust Operation iti Barangay Cabayo ili ti Vintar.
Segun ken ni P/Capt. Jofel Pascual, Hepe ti Vintar Municipal Police Station, nabigbig ti suspek a ni Albert Macadangdang, agtawen ti 44 ken residente ti Barangay Isic-Isic iti nasao nga ili.
Inbatadna a natiliw ti suspek kalpasan a maipagarup a naglako daytoy ti maatap a shabu iti maysa a pulis a nagpammarang kas poseur-buyer.
Inlawlawagna nga adda ti innem nga heat sealed transparent plastic sachet a naglaon ti mapapati a shabu a naala manipud iti suspek.
Malaksid iti daytoy, nakumpiskar pay dagiti otoridad ti calibre 38 a paltog ken uppat a bala daytoy pakairamanan dagiti drug paraphernalia.
Kabayatanna, maibilang ti nasao a suspek kas Street Level Individual iti Drug Watch List dagiti otoridad.
