LAOAG CITY – Nasakit ti nakem ni Mr. Marlon Domingo, mannalon ken residente ti Barangay Cataban ditoy siudad ti Laoag kalpasan a saan a naikkan isuna ti abono manipud iti Department of Agriculture.
Inbatadna a dakkel a tulong ti maipaay koma nga abono kenkuana para kadagiti mulana a mais ken pagay.
Nupay kasta, kunana a saanna a maawatan no apay a nairot isuda kadakuada a mannalon iti pannakaipaay ti abono.
Mainaig iti daytoy, inlawlawag ni Mr. Gil Manuel ti sekretario ti Barangay Cataban Farmers Association ditoy siudad nga awan ti kinapudnona nga adda ti inbatadna ken ni Mr. Marlon Domingo a saanda nga iruar ti mapaspastrekan ti reaper iti assosasionda.
Kunana nga iyur-urayda laeng ti revolving fund a saan pay a naisubli dagiti nagoperar iti nasao a makinaria tapno maisimpa ti datos sakbayda nga ipakaammo kadagiti miembro.
Inlawlawagna a saan nga isuna ti kangrunaan a makin-iggem kadagitoy a banag gapu ta rumbeng a ti Treasurer ken Auditor ti pakaalaan dagitoy a datos.
Inpakaammona nga iti naglabas a tawen ket idandanonda nga adda ti photocopy a naited kenkuana iti kalabes apaman a nagreklamo manen iti nasao a maseknan.
Inbatadna nga addanto ti maiyuswat a panagtataripnongda manen kadagiti opisial maipanggep iti daytoy a banag.
Kunana nga adda ti 19 a sako ti uria ken maysa a trio katorse manipud iti City Agriculture Office.
Inpettengna a pudno a saanda nga ikkan ti fertilizer uray adda ti paggatangna gapu ta ti napagnunumoan dagiti miembro ket no adda ti utang ket umuna a bayadan sakbay a makaala ti sabali a produkto.
Innayonna nga adda ti uppat a ribu a pisos nga utangna nga addan ti sumagmamano a tawenen ti napalabas ngem saanna pay a nabayadan agpapan kadagitoy a gundaway.
Kabayatanna, nagturong ti Bombo Radyo Laoag News Team iti pagtaengan ti Presidente ti asosasion a ni Ms. Merladyn Gacho ngem awan iti pagtaenganna idinto a ni Mr. Regan Baloaloa ket adda iti siudad ti Batac iti agdama.
