LAOAG CITY – Dumakdakkel ti mapaglaklakoan dagiti makiparpartisipar iti BuyIN Sunday market a maisaysayangkat iti sangoanan ti kapitolio probinsial.
Segun ken ni Mrs. Elma Gabriel, mangidadaulo iti Micro Small and Medium Enterprise Office ti gobierno probinsyal a gapu iti daytoy ket maragragsakan dagiti micro small and medium enterprises wenno dagiti babassit a negosiante pakairamanan dagiti mannalon a makiparpartisipar iti nasao a programa ti gobierno probinsial.
Inlawlawagna a pinasingkedan dagiti maseknan a dakkel ti maitultulong ti BuyIN Sunday market iti ibabangon dagitoy manipud iti nagpasaran a perdisyon a ginubuay ti pandemia.
Imbatadna a kageddan ti nasao nga aktibidad ket naiget nga ipatpatungpal dagiti maseknan ti pannakatagiben ti kinapintas ken kinadalus ti sango ti kapitolio.
Immuna iti daytoy, kuna ni Gabriel a kas iti Producer to Consumer Program, mabalin dagiti interesado a mannalon, aglaklako ti nateng ken prutas a makipaset iti BuyIN market babaen iti panagparehistro dagitoy iti MSME Office ti gobierno probinsial.
Innayonna a babaen iti daytoy ket matun-uyan ti napinget a kalikagum ni Gov. Matthew Marcos Manotoc nga ad-adu pay a babassit a negosiante ken mannalon ti matulungan a makabangon iti nagpasaran a rigat a ginubuay ti pandemia.
