LAOAG CITY – Nagun-od ni Emmanuel “Jimuel” Pacquiao ti umuna a panangabak iti Professional Boxing kalpasan a na-knockout iti maikadua a round pay laeng ti American fighter a ni Darrick Gates iti 4-round lightweight fight iti Pechanga Resort and Casino idiay California, USA.
Kalpasan ti maysa a risiris nga umuna a round, insigida nga immatake ni Pacquiao iti maikadua a round.
Nakakonektar isuna ti agsasaruno a danog a linippas ti maysa nga hook isut gapuna a natulid ni Gates.
Ni Gates ket maysa a bare-knuckle fighter ket nakabangon pay sakbay a nalpas ti 10-count ti referee ngem naminsan manen a natulid gapu iti maysa a body shot.
Iti daytoy a gundaway, insardengen ti referee ti laban kalpasan ti maysa a minuto ken 34 a segundo ti maikadua a round ken indeklarar a nangabak via Technical Knockout (TKO) ni Jimuel Pacquiao.
Iti agdama, nga adda ti iggem a rekord ti ubing a Pacquiao a 1 win-0 loss-1 draw.
