LAOAG CITY – Naarestar ti maysa a Filipino-American nga agtawen ti 27 a ni Judd Sanson, maipagarup a konektado iti Jihadist terror group idiay New York City, United States of America.
Simmango ti suspek iti Queens Criminal Court idiay New York idi Lunes, Hunio 17.
Segun ken ni Office of Queens District Attorney Melinda Katz, inaresto dagiti opisial ti polisia ni Sanson bayat ti panagsardeng ti trapiko idi Mierkoles, Hunio 12 ken natakuatan gapu iti panagarmasna kadagiti napeggad nga armas iti luganna nga addaan iti obscured a plaka.
Mainaig iti daytoy, nakita ni Sanson nga addaan iti lugan nga adda ti plaka a naabbungotan iti asideg ti 86th street ken Ditmars iti Queens.
Kinunana a napateg dagitoy a lokasion a nakakitaan ti suspek gapu ta adda 2 a kameng ti New York Police District iti public safety a napaltogan.
Nupay kasta, nagkedked ti abogado ni Sanson a ni Thomas Michael Montella iti kaadda ti media iti uneg ti korte gapu ta patienna a saan a nainkalintegan ti mangaramid iti konklusion iti kaso ti kliyentena idinto a naipakaammo iti publiko ti rupana idinto a saan pay a napaneknekan dagiti alegasion ken awan nangidatag iti ebidensia ngem inlaksid ti hues ti panagkedked ni Montella.
Kabayatanna, naituding ti grand jury a mangikeddeng no adda umdas nga ebidensia para iti pannakabista ti kriminal a darum ni Sanson ken no kasta, agparang manen ni Sanson iti korte inton Hulio 9.
