LAOAG CITY – Kumarkaro ti mapaspasaran a tudo iti sumagmamano a paset ti Myanmar a nangitunda ti panagamak dagiti otoridad para iti isaysayangkat da a rescue operation a mangparigat iti panagbiruk da kadagiti biktima ti napigsa a gingined.
Segun kadagiti aid agencies, possible pay a mangitunda iti panagwaras dagiti sakit a kas ti cholera para kadagiti nakalasat nga awan ti pagnaedan na ken pinili da ti maturog iti ruwar.
Kabayatanna, umaboten iti 3,471 ti bilang dagiti natay kalpasan ti idadayyeg ti magnitude 7.7 a gingined idi Marso 28, idinto nga 4,671 ti nairekord a nasugatan ken 214 dagiti nagtalinaed a mapukpukaw.
Immunan a kiniddaw ni United Nations aid chief Tom Fletcher, iti nayun a tolda tapno matulungan dagit pamilya a napukawan ti balay ken maprotehiran dagitoy manipod iti dakes a sasaaden ti panawen.
Agtultuloy met ti panagipatulod ti tulong dagiti kaparanget a pagilian ti Myanmar kas ti China, India, karaman ti Pilipinas ken dadduma pay a pagilian iti Southeast Asia.
