LAOAG CITY – Nangipatulod ti Mariano Marcos Memorial Hospital and Medical Center (MMMHMC) iti ciudad ti Batac ti medical team iti probinsya ti Abra.
Iti eksklusibo nga interview ti Bombo Radyo Laoag ken ni Doctor Jose B. Orosa III, Chief of Medical Professional Staff II iti MMMHMC, inbatad na a ti medical team a naipatulod iti probinsya ti Abra ket bukbuklen ti 10 nga hospital personnel a pakairamanan ti tallo a doktor, nurses, pharmacist, medical technologist, cook ken EMT trained staff.
Inlawlawag na a gagem ti panangipatulod da ti medical team iti Abra ket tapno mapan da tumulong kadagiti pamilya ken indibidual a naapektaran ti napigsa a gingined iti nasao a probinsya.
Inpakaammo pay ni Doctor Orosa a bitbit ti team a napan iti probinsya ti Abra ti dua nga advanced life support ambulances, medicines, vitamins ken health supplements, medical supplies ken ti portable x-ray machine, karaman dagiti dadduma a kagamitan a mausar para iti panangiyuswat ti operasyon.
Innayon ni Orosa a ti naipatulod a medical team ket agpaot da iti nasao a probinsya iti tallo nga aldaw kalpasan na ket addan to manen ti sabali a team nga ipatulod ti nasao nga ospital.
Kuna pay ni Orosa nga agsusublat dagiti team a maipatulod iti probinsya ti Abra agingga a naan-anay nga agsubli ti normal a sitwasyon iti nadakamat a probinsya.
Mainaig iti daytoy, inbatad ni Doctor Orosa a no adda dagiti pasyente iti probinsya ti Abra a nakaro unayen ti sitwasyon na ket nawaya dagiti maseknan a mangikabil iti ospital iti ciudad ti Batac.
