LAOAG CITY – Nasakit ti nakem ken saan a maawat ti saanen a nainaganan a balasang ti maipagarop a panangkammet ni Mr. Totsie Ilaga, market master iti ili ti San Nicolas bayat nga adda iti maysa a groserya.
Segun kenkuana, napan nagsingir iti tiendaan iti nasao nga ili ken idi adda iti groserya na gimmatang ti softdrinks ket simrek ni Ilaga ken ditoy a maipagarop nga inrapin na a ginammatan ti patong ti balasang.
Inbatad na a gapo iti pannakakigtot na ket naibbatan na ti iggem na a meryenda.
Inlawlawag na a nagpadespensar ni Ilaga kenkuana ken ti palawag ti maseknan ket ti ammo na nga iniggaman na ti patong na ket ti maysa kadagiti para-lako na gapo ta agkabkabagi da.
Naamoan a kalpasan daytoy ket napan nagipulong iti lolo na ken nagsasarita da iti opisina ni Ilaga ken inadmitir met ti maskenan ti inaramid na iti babai.
Mainaig iti daytoy, kuna ni Mr. Perfecto Damo, ti lolo ti biktima nga idi kinomprontar da ni Ilaga ket nagpadespensar ken kunana a basol na ti napasamak ken inarakop na daytoy.
Nupay kasta, kuna na a desidido da a mangipila ti reklamo kontra kenni Ilaga.
Innayon na a gapo iti pasamak ket kanayun a makigkigtot ti apoko na uray isuda laeng ti mangpaguni.
Kabayatanna, inlawlawag ni Ilaga a napan iti groserya tapno mangala ti tasa a nakasab-it gapo ta adda ti agkape iti opisina na.
Segun kenni Ilaga, idi naala na ken inbaba na ti ima na ken eksakto met nga adda ti balasang.
Inpetteng na nga induron wenno inwalin na ti balasang gapo ta magna ken awanen ti sabali nga inaramid na iti biktima.
Malaksid iti daytoy, saan metten a nangipaay ti ad-ado pay a komento ni Ilaga mainaig iti nasao a pasamak.
