LAOAG CITY – Inbatad ni Niño Oconer, ti Secretary General La Union Peace and Justice Advocates, a dua laeng a banag ti kayatda a lagipen ita nga aldaw, Setyembre 21, daytoy ket ti maika-54 nga anibersaryo ti martial law, ti ibilang na a nalidem a paset ti pakasaritaan iti pagilian, ken ti maikadwa ket ti umuna nga anibersaryo ti nalawa a tignay protesta kontra iti korapsyon, aglalo iti flood control scandal.
Inpetteng na a ti dua nga okasyon ket adda ti pagpadaan na iti panagtultuloy ti culture of impunity, agtultuloy a panagtakaw iti pagkabanan ti umili ken ti agtultuloy a pananglabsing ti karbengan ti tao.
Kuna na a kas pammaneknek ket makita no kasanu a maus-usar ti pamilya Marcos ken amin a kakadwa na iti pulitika ti posisyon tapno maliklikan ti amin a pagsungsungbatan da.
Inyarig ni Oconer ti pannakaibasura dagiti kaso a graft ni dati a 1st Lady Imelda Marcos, idinto a ni dati a Department of Public Works and Highways Secretary Manuel Bonoan ket kayatda a pagbalinen kas state witness iti flood control anomaly.
Malaksid iti daytoy, inpalgak pay ni Oconer nga iti budget deliberation ket nakaad-ado ti nakissayan ti pondo na iti social services idinto nga adda ti pondo iti korapsyon kas ti flood control comeback, agkakadakkel a binilyon a pondo ken adda pay ti baro nga item, daytoy ket ti Oplan kontra Baha.
Innayon na a saan pay a nalpas ti laban kontra iti korapsyon iti pagilian gapu ta saan pay a nabalud dagiti karaman iti nalawa a panagtakaw iti pagkabanan ti umili.
