LAOAG CITY – Masapol ti naan-anay a disiplina ti panagusar iti gadget tapno maliklikan ti panaglukmeg ken panagginad iti brain development dagiti ubbing.
Daytoy ti inpakaammo ni Dr. Alan Taylan, maysa nga Health Practitioner iti Internal Medicine – St. Camillus De Lellis Hospital ditoy siudad ti Laoag.
Segun kenkuana, dakkel ti epektona iti nalabes a panagtutok kadagiti gadget kangrunaanna iti body weight, blood pressure ken blood sugar a mangitunda ti cardiometabolic problem iti salun-at.
Inbatadna a posible a maapektaran ti emotional ken physical activities pakairamanan ti communication skills dagiti ubbing no mabaybay-an ti kankanayon a panagusar dagitoy iti gadget.
Kunana a mabalin pay nga agkurang ti turog ken maapektaran ti sistema ti bagi dagiti ubbing gapu iti nalabes a panagusar ti gadget.
Maipalagip a nakita iti maysa a panagadal nga agresulta iti panagbalin nga overweight a maysa a klase ti malnutrision ti nalabes a panagtutok dagiti ubbing iti panagusar ti gadget.
