LAOAG CITY – Balligi a naiwayat ti “Mataginayon a Progreso Assistance Program” para kadagiti addan ti babassit a negosyo ditoy probinsiya.
Daytoy ti inbatad ni Mrs. Elma Gabriel ti mangidadaulo ti Micro-Small and Medium Enterprises wenno MSME ditoy probinsya.
Segun ken Gabriel, ti nasao a programa ket nangrugi pay laneg idi 2021 ken naitultuloy tapno maipaayan ti naananay a tulong dagiti babassit a negosyo.
Kunana nga adda dagup a 211 a negosyante ti naipaayan ti tulong iti 2-day training a naiwayat iti Laoag City Centennial Arena, no sadinno a dagiti nagbalin a trainor ket manipud iti Mariano Marcos State University.
Dagiti nakipagpaset ket dimmalanda iti learning session maipanggep iti simple bookkeeping, entrepreneur, product packaging and labelling, food safety ken dadduma pay.
Malaksid iti learning session ket adda pay nabunong a 5,000 pesos a financial assitance iti tunggal maysa kadakuada.
