LAOAG CITY – Pinalawa ti gobierno ti maternity benefits ti PhilHealth tapno makatulong iti ngumatngato a gastos iti panagpasngay.
Inbatad ni Presidente Ferdinand Marcos Jr. iti babaen ti baro a benepisio nga agarup triple ti ipangato ti coverage para iti normal delivery manipud ₱9,750 nga agbalin a ₱29,000.
Ad-adda a dumakkel ti ibaklay para iti cesarean section, manipud ₱37,000 ket agbalin a ₱58,000 agingga ₱62,000.
Pinalawa pay ti prenatal care no sadinno nga agbalinen a walo ti check-up manipud iti dati nga uppat pakairamanan ti napapateg a laboratory tests ken bakuna.
Adda ti tallo a follow-up check-up kalpasan a nagpasngay nga ibaklay ti PhilHealth.
Segun iti Presidente, iti sumagmamano a kaso ket mabalinen nga awan ti bayadan ti pasiente aglalo no ward nga agpasngay uray iti pribado nga ospital.
Gagem ti programa a matagiben ti salun-at ti ina ken maladaga ken masigurado a saan a lapped ti kinakurang iti kuarta iti natalged a panagpasngay.
