LAOAG CITY – Nagballaigi dagiti Mathletes ti Sarrat National High School iti naisayangkat a the Guangdong – Hong Kong – Macao Greater Bay Area Mathematical Olympiad idiay Macao.
Segun ken ni Mr. Michael Malvar, ti Coach iti Sarrat National High School, dagiti estudiante a nangabak iti nasao a pasalip, iti Secondary 2 ket isuda Brian Jansen Vallejo, ti World Champion ken nakagun-od ti Gold Award, Allen Iver Barroga, ti World 1st Runner Up ken nakagun-od ti Gold Award, Natalie Margaret Balisacan ket nakagun-od ti Gold Award ken iti Secondary 3 ket ni Zyrene Angelica Dulluog, ti World Champion ken nakagun-od ti Gold Award idinto nga iti Senior Secondary ket ni Ivan Genesis Calaro a nakagun-od ti Silver Award.
Inbatadna a rinibu nga estudiante dagiti nakipaset manipod kadagiti 13 a pagilian iti intero a lubong a pakairamanan dagiti Asian countries, Europe ken Australia.
Inlawlawagna a kadagupan kadagiti amin a nakisalipanda ket daytoy ti ibilangna a karigatan a kompetision.
Gapu iti daytoy, kunana a kinasapulanda nga irebyu a naimbag dagiti maseknan nga agad-adal babaen iti panagsanayda kadagitoy tunggal Sabado ken Domingo.
Kuna ni Mr. Malvar nga apaman a naammoanda a kualipikadoda iti nasao a kompetision ket dagusda a nagsagana a nagpaot ti nasurok-kumurang uppat a bulan a nangrugida idi bulan ti Disiembre iti napalabas a tawen.
Mainaig iti daytoy, inpakaammona a no bilang makagun-odda ti balitok iti mamindua a daras iti finals ket makastrekda iti World International Mathematical Olympiad.
Kabayatanna, naammoan a nagpaot ti uppat nga aldaw ti panagbibinnalubal dagiti ribu nga estudiante manipod iti nagduduma a suli iti lubong.
