LAOAG CITY – Inrakurak ni Atty. Julius Balbas, Commission on Election Officer ditoy siudad ti Laoag a nakalukat latta ti opisinada para iti maudi nga aldaw iti panagparehistro dagiti botante para iti mapaspasangasangan a 2025 Midterm Elections.
Inlawlawagna a daytoy ket kas pammilin nga inyatnag ti Regional Director ti Commission on Elections nga akomodarenda latta dagiti mapan agturong iti opisinada iti baet ti agdama a mapaspasaran a napigsa a tudo a buyugan ti angin gubuay iti Bagyo Julian.
Kunana a nakalukat ti opisinada agingga inton alas singko ti malem ita nga aldaw ti Lunes, Setiembre 30 para iti maudi nga aldaw a pannakaipatungpal ti voter’s registration.
Innayonna a kabayatan a maisursurat daytoy a damag ket addan ti nasurok 4 a ribu a botante ti nakarehistron ditoy siudad ti Laoag sipod idi Pebrero ita a tawen.
