LAOAG CITY – Inlawlawag ni Barangay Chairman Elviro Agoo iti Barangay Davila idiay ili ti Pasuquin a dakkel a pukaw dagiti mangalap iti nasao a lugar ti kaadda dagiti maipagarop a Vietnamese fishing vessels.
Segun kenni Agoo, maup-upayen dagiti mangalap iti barangay da gapo ti kinabassit dagiti makalapan da a lames bayat ti kaadda dagiti fishing vessels iti tengnga ti taaw.
Inbatad na nga awanen ti mabati a lames para kadagiti mangalap iti nasao nga ili gapo iti kaado dagiti maall-ala dagiti ganganaet a para kuma kadagiti kabarangayan na kas kangrunaan a pagbiagan da.
Mainaig iti daytoy, kuna ni Agoo a nabagaan dagiti mangalap nga agreport dagus no adda ti mapaneknakan da a ganganaet nga agkalkalap iti baybay a sakop ti nasao nga ili.
Kunana a saan da nga itulok a takawen amin dagiti ganganaet dagiti lames a para kuma kadagiti mangalap iti lugar.
Kabayatanna, mangnamnama ni Agoo a no adda ti matiliw a ganganaet a nakaluga kadagiti fishing vessels ket saan nga ikkan ti Presidente Rodrigo Duterte ti amnestiya tapno mabuteng da nga umay aggasaw-gasaw iti teritorya ti pagilyan.
