LAOAG CITY – Silulukat ni Baguio City Mayor Benjamin Magalong iti posibilidad nga agbalin a paset iti maysa nga independent body a mangiyuswat ti imbestigasyon kadagiti flood control project iti intero a pagilian.
Segun ken ni Magalong, nakasagana nga ag-volunteer nga agbalin a paset ti independent body laketdi mapabus-oyan daytoy nga agpili kadagiti imbestigador nga agbalin a paset iti nasao komite.
Kiniddaw pay ti mayor a no mabalin ket mapalubusan nga isuna ti personal nga agpili kadagiti ahenisya a mairaman iti komite tapno masigurado ti kredibilidad ti imbestigasyon ken ‘reputable’ dagiti lead agency a mangiyuswat iti daytoy.
Iti pakabuklan ti imbestigasyon, kuna ti mayor a mabalin na nga usaren dagiti kapadasan na kas dati nga heneral ken imbestigador ti nailian a pulisya.
Immunan nga inlungalong ni presidential son, Rep. Sandro Marcos, a maysa nga independent body ti mangiyuswat ti imbestigasyon ken saan a mismo a ti kamara de representantes gapu ta kakadwa da dagiti maipagarop a karaman iti maanomalya a flood control projects.
Mamati met ni Mayor Magalong nga awan ti umdas a kabaelan ti kamara de representantes wenno ti Regional Project Monitoring Office ti Department of Public Works and Highways tapno imbestigaren ti naruay a flood control projects iti pagilian.
