LAOAG CITY – Inpetteng ni Bamban Mayor Alice Guo nga inosente isuna ken inkarina ti agtultuloy a panagdepensa iti integridad ken kinataona kalpasan a sinuspinde ti Ombudsman kaduana dagiti dua a dadduma pay iti uneg ti innem a bulan gapu iti nadagsen nga ebidensia a mangipakpakita a guilty dagitoy.
Iti maysa nga statement, inbatad ni Guo nga iresrespetarna ti legal a proseso ken maawatanna ti desision ti Ombudsman.
Kunana a nagserbi daytoy iti lugarda ken dagiti umili nga addaan ti integridad.
Mamati ni Mayor Guo a nakasagana a makitinnulong kadagiti otoridad tapno maipasigurdo ti kinapudno ken hustisia.
Inlawlawag ni Bamban Mayor a maladingitan unay daytoy kadagiti maibatbato nga akusasion kontra kenkuana ken arungaingna ti pannakakondenar kenkuana sakbay pay a mangngegan ti takderna.
Inpalgakna a daytoy ket panagsalungasing iti karebbenganna kas indibidual ken lider a binutusan dagiti botante ti Bamban.
Kabayatanna, kinuna met ti abugado ni Guo a ni Atty. Nicole Jamilla a biktima ti Mayor ken saan a nainkalintegan a pannakairamraman iti isyu a maipagarup a namunganay iti regulatory responsibilities ti Philippine Amusement and Gaming Corporation.
Innayonna a ti pannakaipaay ti business permit iti Philippine Offshore Gaming Operator firm a Zun Yuan ket sumurot laeng iti maipatpatungpal a proseso ken protocol pakairamanan ti Philippine Amusement and Gaming Corporation ken ti pannakapaay ni Guo a dagus a maikkat ti business permit ket maiyallubog iti due process a kasapulan a suruten.
