LAOAG CITY – Inpakaammo ni Barangay Chairman Jondi Bayudan iti Barangay Sto. Niño iti ili ti Nueva Era nga addan dua a lawas nga agar-aramid ti tinapay a maibunong para kadagiti residente ken frontliners iti nasao nga ili.
Segun kenkuana, nangestablisar ti panaderya iti asideg ti ecopark ni Mayor Aldrin Garvida iti nasao nga ili.
Inbatad na nga amin a mausar iti panagaramid na ti tinapay ket personal a kwarta ti mayor ken ti asawa na a bise mayor.
Inlawlawag na a dua a supot nga arena ti maaramid na a tinapay iti kada aldaw karaman ditoy ti buns, pandesal ken dadduma pay.
Kuna na nga adda ti tallo a kakadwa na ken dagitoy ti katulungan na nga agiplastar kadagiti maaramid na a tinapay babaen ti panagusar na ti oven.
Innayon na a no makaluton ti tinapay ket umuna mabunongan dagiti frontliners a kangrunaan a maipaspasango kabayatan iti mapaspasaran a krisis gapu iti covid-19 a nangitunda ti pannakaideklara ti total lockdown ditoy probinsya.
Naamoan a ti kapitan ket 15 a tawen a nagbalin a panadero iti nagduduma a panaderya ditoy probinsya.
