LAOAG CITY – Inlawlawag ni Mayor James Bryan Alcid ditoy ciudad ti Laoag a saan a makaiparuk-at a dagus ti deklarasyon para iti pannakasuspenso ti klase no saan a napintas ti sasaaden ti panawen.
Daytoy ti nagbalin a rakurak ti mayor kalpasan nga adda dagiti estudyante a nangbabalaw kenkuana gapu iti ibilang da a naladaw a pannakaiwaragawag ti pannaka-kanselar ti klase ditoy ciudad ti Laoag.
Inbatad na a sakbay a mangiparuk-at ti statement ket adda paylaeng dagiti addang nga aramiden na tapno matingiting no ania ti pudno a sitwasyon ditoy ciudad.
Karaman ditoy ti pannaki-koordinar da nga umuna iti City Disaster Risk Reduction and Management Council; Philippine Atmospheric, Geophysical, and Astronomical Services Administration (PAGASA); Department of Education ken iti gobierno probinsyal.
Mainaig iti daytoy, kunana a nakadepende iti panawen iti panangsuspenso na ti klase kadagiti pagadalan no sadinno a gapu ta yellow warning laeng ditoy ciudad ket dagiti laeng agad-adal manipod kindergarten agingga iti elementarya ti nakanselar ti klase na idi kalman.
Kiniddaw met ni Mayor Alcid nga agbalin koma laeng a kalmado iti tunggal maysa.
Innayon na a ti kinatalged iti tunggal maysa ti gagem ti amin.
Kabayatanna, inbatad ti mayor a maragsakan gapu kadagiti komento manipod kadagiti estudyante ngem napinpintas no iti nasayaat a wagas iti panangirakurak da.
