LAOAG CITY – Ibilang ni Mayor Remigio Medrano iti ili ti Sarrat a makaalarma ti sitwasyon iti ili da kalpasan ti panagpositibo dagiti innem a baro a kaso ti Covid-19 ditoy probinsya.
Nupay kasta, kuna ti Mayor a saan da met a baybay-an dagiti kailyan na ken agtultuloy ti naiget a contact tracing kadagiti nakapulapol dagiti baro a kaso.
Segun kenni Medrano, dagiti ummunan a nadeterminar a nakapulapol dagiti nagpositibo ket dimmalan dan iti swab testing ken ur-urayen da ti resulta na.
Inlawlawag na a dagiti nagpositibo iti virus ket adda iti Provincial Isolation Facility idinto a dagiti dua kadagitoy ket nagtalinaed iti quarantine facility iti ili da pakairamanan dagiti primary contacts dagitoy bayat a maur-uray ti resulta.
Kunana nga uray negatibo ti resulta dagiti nakapulapol dagiti pasyente ket ipalippas da latta ti panag-quarantine dagitoy.
Inbatad na a maysa kadagiti baro a kaso ti covid-19 iti ili da wenno ni IN-C48 ket agtrabtrabaho iti Manamnama Multi-Purpose Coop. ken ti nakapulapol na nga ummunan a nagpositibo ket ni IN-C41, idinto a dagiti lima ket saan da a rumrumwar ngem naaddaan ti direct contact kenni IN-C43.
Mainaig iti daytoy, inpetteng ni Medrano a bayat ti pannakaipatungpal ti lockdown ket saan dan a pulos nga ipalubos a rumwar ken sumrek uray dagiti APOR.
Inbaga na met a dagiti medical practitioners nga agtrabtrabaho kadagiti ospital ket mabalin nga ikonsiderar da a rumwar manipud iti pagtaengan da.
Innayon ni Medrano nga ipamima na iti Medical Experts iti panangirakurak no adda ti local transmission iti nasao nga ili.
Kabayatanna, kuna ni Medrano a naka-quarantine ti agtaltalado iti Barangay Capasan iti ili ti Dingras ken iberberipikar da pay a nalaing no pudno ti alegasyon a nakapulapol ti maseknan ti positibo iti virus.
