LAOAG CITY – Inbatad ni Mayor Remigio Medrano iti ili ti Sarrat a pinatuludan na ti show cause order ni Barangay Chairman Wenceslao Valdez iti Barangay 9 iti nasao nga ili.
Daytoy ket tapno mapan agpalawag mainaig iti napasamak iti barangay da pakaseknan ti maipagaop saan a panangala amin dagiti recipients ti Social Amelioration Program (SAP) ti P5,500 a pisos nga awaten koma ti tunggal maysa.
Rumrumuar a 3 ribo a pisos laeng ti innala dagiti 98 a recipients ti SAP gapu ta ti 2,500 a pisos ket inted da iti kapitan tapno ibunong na met kadagiti saan a nakaala ti nasao a tulong pinansyal.
Maipalagip a ti nasao a pondo ket maited koma laeng kadagiti mapili a benepisyaryo ti SAP kas ti Senior Citizen, Persons with Disability (PWD), masikog wenno ina nga agpaspasuso, solo parent, indigent ken dadduma pay.
Segun ti mayor, no bilang mapasubli ni Valdez ti kwarta ken maited kadagiti rebbeng na a pakaitedan na ket saanna a kayat a sawen a mapakawanen ti linteg ken awanten na lattan nga awan ti aniaman na.
Innayon na a kas opisyal ti barangay ket rumbeng koma nga isuda ti pagwadan saan nga isuda ti umuna a manglabsing ti paglintegan.
Kabayatanna, inbatad ni Barangay Chairman Wenceslao Valdez iti Barangay 9 iti ili ti Sarrat a pagayatan a mismo dagiti recipients ti Social Amelioration Program (SAP) ti nangkissay iti naawat da ken inted da kenkuana tapno maibunong met kadagiti saan a nakaawat ti nasao a tulong pinansyal.
Segun ken ni Valdez, nakaad-adon dagiti naawat da a tulong para iti barangay da ken sapasap a maibunbunong kadagiti amin a bumarangay.
Gapu iti daytoy, indiaya dagiti 98 recipients ti SAP nga imbes nga alaen da amin ti P5,500 a pisos ket 3 ribo a pisos laeng ti innala da idinto ti 2,500 a pisos ket naited iti kapitan tapno ibunong na kadagiti saan a nakaawat ti cash aid.
Nupay kasta, saan a nalawag no mano amin dagiti naikkan ken no sagmamano da ti inawat.
