LAOAG CITY – Maluksaw ni Mayor Michael Marcos-Keon ditoy ciudad ti nagbalin a rakurak ti kaanakanna a ni 1st District Congressman Sandro Marcos maipanggep iti maysa a bilyon a pisos a pondo para iti dalan nga agturong iti dakkel a mall ditoy ciudad ti Laoag.
Segun iti Mayor, proposal pay laeng daytoy ken inpakaammu na nga immunadan a nakapasarita ken Cong. Sandro idi Pebrero ita a tawen kabayatan ti panagtataripnong dagiti amin a mayor iti umuna a distrito, isu nga agsiddaaw daytoy nu apay a kalpasan laeng ti walo a bulan sakket ditoy a nakwestyunaran ti nasao a proposal ken arigna ti rumrumwar iti rakurak ni Cong. Sandro ket corrupt isuna.
Iti laksid a ti mangig-igem daytoy a proyekto ket ti Department of Public Works and Highways (DPWH), inpettengna nga awan ti pakainaigan na iti aniaman a pondo, ken ti ammo na ket nalipatanda payen daytoy a kiddaw na isu a saanan nga indarirag pay.
Inlawlawagna nga indasarna idi ti panag-operar ti dakkel a mall ta posible nga agproblema ti ciudad ti nairot a trapiko ken dinamag ti Congressman nu ana ti plano na isu nga idasarna na met dagiti plano na nga adda kuma maaramid a dalan, no sadinno nga inbaonna daytoy a kasaritana ni Mr. Ryan Remigio – Head ti District Office.
Basar kenkuana, immanamong ni Mr. Remigio iti indasar ti ti Mayor maipanggep iti maaramid a dalan tapno makaliklik iti nairot a trapiko isu a pinagsuratna daytoy ti letter a mangilawlawag ti kalikagomna.
Innayonna a daytoy ti rason nu apay a nagsuratda ken ni Department of Public Works and Highways Secretary Manuel Bonoan, ken pinatuludanda pay ti kopya ti opisina ni Cong. Sandro.
Innayon ti Mayor a naisayangkat ti taripnongda kadwada dagiti representative ti dakkel a mall ken city engineers sakbay a rimwar ti nasao a gatad.
Basar iti inpatulod a surat ti lokal a gobierno ditoy siudad, nakailanad ditoy ti pondo a mabingay iti P500 million manipud iti distrito ken P500 million manipud iti dakkel a mall.
Inlawlawag met ni City Engineer Marichel Batuac ti plano seknan iti alternate road a mabalin a pagdalanan agturong iti dakkel a mall.
Kunana a ti dalan ket mangipasdek da ti 100 meters nga underpaas iti Gilbert Bridge ken mai-expand pay ti flood control na iti pito a metro.
Malaksid iti daytoy ket adda pay ti maipan a solar lights iti nagsiinumbangir a dalan.
Ti maysa a bilyon a pisos ket maiyalokar iti panaggatang ti lote, concrete pavement, solar lights, underpass, ken panangpalawa iti tributary roads.
Kabayatanna, patien ti Mayor a saan a makaumanay ti pannaka-ipalawa ti dalan iti airport road nu saan a maiyimplementar daytoy a plano.
Maipalagip nga immunan nga inrakurak ni Cong. Sandro Marcos a naluksaw da iti kadakkel ti kiddaw ti Mayor a pondo ken apaman a nagsaludsod daytoy iti Department of Public Works and Highways ket naduktalan a P30 million laeng ti kasapulan para iti nasao a kalsada.
