LAOAG CITY – Kiniddaw ni Mayor Michael Marcos Keon kadagiti Treasurer ti pagilian ti umiso ken naannayas a panangusar ti pundo iti kada lokal a gobierno.
Daytoy ket kabayatan ti naiyuswat a National Convention kadagiti Provincial ken Local Treasurer iti intero a pagilian ditoy siudad ti Laoag.
Segun kenkuana, dakkel ti akem dagiti maseknan a Treasurer gapu ta isuda ket maibilang kas pitaka iti maysa a Local Government Unit nga isu ti mangimanmaniher ti pundo iti sakupenda a lugar.
Inbatadna a babaen kadakuada ket makontrol ti pannakaiparuk-at dagiti pundo para kadagiti nagduduma nga aktibidad ken proyekto.
Inlawlawagna a dakkel ti panagyamanna iti City Treasurer-na ken siguradoenna ti napintas a pannakilangenlangenna kenkuana para iti napinpintas a koordinasionda.
Innayonna a naiget pay ti pannakikoordinarna iti Local Finance Committee kadagiti aniaman nga addang wenno tignay nga aramidenna.
