LAOAG CITY – Mangnamnama ni Mayor Rafael Benemerito iti ili ti Pagudpud nga agbalin a 1st class Municipality ti ili da manipud iti dati a 4th class Municipality.
Segun kenkuana ket iyur-uray da laengen pormal a pannala-ideklara na daytoy sipud da addan ti naawat da nga impormasyon a ti ili da ket agbalinen a 1st class Municipality.
Kunana a no mapasamak daytoy ket dakkel ti agbalin a bentahe da gapu ta ad-adda pay a magutigot dagiti investors nga agpuonan iti ili da, nangruna iti sektor ti turismo.
Inlawlawagna a dagiti kangrunaan a kwalipikasyon ket ti income, populasyon ken ti land area.
Maipalagip a ti ili ti Pagudpud ket maysa kadagiti pagturturongan dagiti turista gapu ta nabaknang ti ili kadagiti nagduduma a tourism spots.
Iti agdama ti nasao nga ili ket addaan ti land area a 194.90 square kilometers, ken addaan ti nasurok 25,000 a populasyon.
