LAOAG CITY – Naupay ni Mayor Richard Degala iti ili ti Vintar kalpasan a naduktalan na nga ado dagiti saan a naileppas a proyekto iti napalabas nga administrasyon.
Gapu iti daytoy, kalikagom ti mayor nga uray awan paylaeng dagiti marugyan a proyekto na iti umuna a tawen a panagtugaw na basta maileppas aminen dagiti narugyan a proyekto ti lokal a gobierno iti nasao nga ili.
Inpalgak na a ti prayoridad na ket dagiti proyekto a pakabenepisyaran amin dagiti residente iti ili ti Vintar.
Malaksid iti daytoy, kayat pay ti mayor a masolbar amin a problema ti lokal a gobierno kas iti panagibelleng kadagiti basura iti sanitary landfill iti nasao nga ili.
Inpetteng na nga uray mapagsisina dagiti basura manipod kadagiti agrupsa ken saan no aggigiddan a mabunag dagitoy ket dakkel ti posibilidad na nga agtitipon da metlaeng iti landfill, banag a saan a napintas a kitaen.
Inpalgak na a ti plano na ket agduma ti aldaw a pannakabunag dagiti agrupsa ken saan a basura tapno saan da nga aglalaok.
