LAOAG CITY – Inpetteng ni Mayor Alfredo “Boying” Valdez iti ili ti San Nicolas nga awan ti inparuk-at na a memorandum a mangiparparit kadagiti residente iti ili ti Sarrat a mapan iti merkado publiko iti ili da.
Segun kenni Valdez, masapol laeng a masurot dagiti guidelines tapno awan ti agbasol.
Sungbat daytoy ni Valdez iti maipagarop a pannaka-discriminate iti SK Chairman iti ili ti Sarrat babaen kadagiti dua nga empleado ti merkado publiko.
Inlawlawag ni Valdez nga idi timmawag kenkuana ni Mayor Remigio Medrano iti ili ti Sarrat ket inbaga na a saan na nga iparit a mapan iti tiendaan dagiti taga-Sarrat ngem masapol a dagitoy ket saan a naggapo kadagiti nakalockdown a barangay.
Daytoy ket gapo ta no ti naggapoan dagiti residente ket kadagiti barangay a nakalockdown, aglablabsing da iti protocol.
Inbatad na a nagtulag da kenni Medrano a mang-isyu ti mayor ti certification a dagiti mapan iti tiendaan ket aggapo kadagiti saan a naka-lockdown a barangay tapno awan ti malabsing.
Mainaig iti daytoy, kuna pay ni Valdez a ti palawag kenkuana dagiti dua nga empleado ti tiendaan ket saan da a binugkawan ti SK Chairman.
Innayon na a gapo ta adda ti face mask ken face shield dagiti maseknan ket posible a ngumato ti kapigsa ti boses tapno mangeg dagiti kasarita da.
Iti sabali a bangir, inlawlawag ni Valdez nga awan ti pakainaigan na iti covid-19 ti issue seknan kenni Mrs. Lily Bueno, maysa kadagiti aglaklako ti nateng.
Kuna ni Valdez a nabayagen a bagbagaan na ni Bueno a saan nga iti uneg ti munisipyo ti pagpwestoan na.
Ummuna iti daytoy, kuna ni Bueno a maipagarop a napasaran na ti pannakalanglangi iti nasao nga ili.
