LAOAG CITY – Inpakaammo ni alyas “Nicole” a walo a tawen daytoy a nakikappeng iti makakannigid a grupo.
Segun kenkuana, agtawen daytoy ti 16 idi simrek isuna iti New Peoples Army ket ditoy a napadasanna ti kinarigat iti panagbiag.
Inbatadna a saan a masinunuo ti kinatalged ti panagbiag kabayatan ti pannakikappengna iti grupo dagiti rebelde.
Inlawlawagna a kanayon a magmagnada ti nakaad-adayo a lugar uray kasano ti rigat, bisin ken bannog a marikriknada.
Kunana nga adu ti napukaw kenkuana sipod idi nakikappeng isuna iti grupo dagiti rebelde kas ti karebbengan iti panagadal, saan a nakadenna dagiti nagannak ken saan a nagbalin a normal ti panagbiagna.
Innayonna nga apaman a nagsubli daytoy iti gobierno ket nakaawat daytoy ti tulong pinansial ken in-inot a simmayaat ti dana ti panagbiagna.
Iti agdama, naragsakna nga inburay a nagsubli daytoyen iti panagadal.
