LAOAG CITY – Naarestar ti maysa a babai iti Brgy. Cabaritan iti ili ti Dumalneg kalpasan iti naisayangkat nga anti-illegal drug buy-bust operation.
Segun ken ni Police Captain Irineo Sibucao, Hepe ti Philippine National Police iti nasao nga ili, nabigbig ti suspek a ni Cleofe Felipe y Bunay a mas am-ammo iti nagan a Cleofe Bunay wenno Openg, addaan ti umno a tawen, self-employed ken residente iti nasao a barangay.
Inbatadna a natiliw ti suspek kalpasan a linakoanna ti maysa a heat-sealed transparent plastic sachet a naglaon ti shabu iti maysa a pulis a nagpammarang kas maysa a poseur-buyer.
Malaksid iti daytoy, kuna ni Police Captain Sibucao a narekobre ken nakumpiskar manipod iti suspek ti innem a heat transparent plastic sachet a naglaon ti maatap a shabu, maysa nga open transparent plastic sachet, maysa a multi-colored pouch a naglaon ti tallo a heat-sealed transparent plastic sachet a naglaon ti maipagarup a shabu, lima a transparent plastic sachet a naglaon ti white residue, tallo a long aluminum foil strips, tallo a crumpled aluminum foil strips, maysa a transparent shovel made wenno drinking straw, dua a 1-thousand peso bill, maysa a yellow cigarette lighter, maysa nga aluminum foil a nabungon ti white masking tape, maysa a folded carton paper a nabungon met ti white masking tape ken maysa ribu a pisos a nausar kas buy-bust money.
Inlawlawagna a mapatta-patta nga agdagsen ti nasurok-kumurang maysa a gramo dagiti nakumpiskar nga items nga agbalor ti 6,800 a pisos.
Kunana a ti suspek ket drug surrenderee, maibilang kas Street Level Individual ken nagpositibo iti drug test daytoy.
Innayonna a naimatangan da Barangay Kagawad Noel Lagoc ti Brgy. Cabaritan iti ili ti Dumalneg ken ni Ms. Hazel Orque ti pannakabagi ti Department of Justice ti anti-illegal drug buy-bust operation.
Mainaig iti daytoy, ballaigi ti naisayangkat nga operasion babaen iti nagtitipon a puersa ti Dumalneg Municipal Police Station kas nagserbi kas lead unit, PPDEU ken PIU. Kabayatanna, manamnama a sumango ti suspek ti kaso gapu iti panaglabsingna iti Republic Act 9165 wenno ti Comprehensive Dangerous Drugs Act of 2002.
