LAOAG CITY – Nasakit ti nakem ti maysa a babai a ni alyas Rose iti Barangay Paltit iti ili ti Badoc kalpasan a maipagarop a kinabkabil ti maysa a konsehal iti nasao nga ili.
Segun ken ni alyas Rose, napan iti farm ti konsehal tapno mapanna kitaen ti anakna gapu ta intugot ti live-in partner na nga agpapaay kas personal assistant ti nasao nga opsiyal.
Kuna na a ditoy metten a sinalangad ti konsehal kadwa na ti asawa na gapu ta isuna ti pabasolen da a maipagarop a nangusar ti account ti live-in partner na ken maipagarop a nagpost ti “kaimas ti agawat, urayla dumandanun parparbangon”.
Inpetteng ni alyas Rose nga awan ti ammo na iti nasao a post isut gapu na a nasakit unay ti nakemna gapu ta malaksid iti panangsalangad dagiti agasawa ket maipagarop a binekkel, dinanog ken inpadeg pay ti konsehal.
Malaksid iti pannakadangran ni Alyas Rose, maipagarop nga insawang pay ti konsehal ti “marmarwam kan patayen dakansa lattan”.
Patien ni Alyas Rose a naibaga ti konsehal a marmarwam isuna gapu iti isyu iti pannakatay daydi asawa na a nagpaay metlaeng iti nasao nga opisyal no sadinno nga adda idi ti gap da.
Inpakaammo ni Alyas Rose a naipa-blotter nan ti napasamak kenkuana iti Philippine National Police ken napan payen nagpa-medical.
Innayon ni alyas Rose a malaksid iti konsehal ket dinangran pay a mismo ti live-in partner na gapu ta maipagarop nga inbaon da daytoy.
Iti agdama, pursigido ni Alyas Rose nga agpila ti reklamo kontra iti nasao a konsehal tapno magun-od na ti hustisya kalpasan ti pannakadangran na.
Agpapan ita ket awan met pay ti inparuk-at a komento ti nasao a konsehal.
