LAOAG CITY – Natay ti maysa a babai kalpasan a nalmes iti karayan iti paset ti Sitio Kibakib, Barangay Subec iti ili ti Pagudpud
Daytoy ti kinumpirmaran ni Police Major Edward Santos, ti chief of police iti ili ti Pagudpud.
Binigbig ni Santos ti biktima a ni Rosalina Mariano, agtawen ti 49, awanan ti asawa ken residente iti nadakamat a barangay.
Inbatad ni Santos a ti biktima ket umel, tuleng, ken adda ti sakit na nga epilepsy.
Kuna na a basar iti pamilya ti biktima ket kanayun a mapan agdigus daytoy iti karayan gapu ta asideg laeng ditoy ti balay da.
Innayon na nga iti papan panagdigus ti biktima idi kalman ket nakita laengen a tumtumpaw ken iti panagresponde da kadwa da ti Municipal Health Officer ken BFP rescue team iti ili ti Pagudpud ket naduktalan a pimmusayen daytoy.
Inpakaammo ni Santos a basar iti Municipal Health Officer iti ili ti Pagudpud, awan ti foul play iti pannakatay ti biktima.
