LAOAG CITY – Natay ti maysa a baket nga agtawen ti 73, balo ken residente iti ili ti Bacarra.
Segun ken ni P/Lt.Col Roldan Suitos, ti hepe ti Philippine National Police it ili ti Bacarra, immuna a nakaawat da ti report nga adda nabagkong a baket iti Barangay 14 iti nasao nga ili rason nga insigida da a nagresponde.
Basar iti report ti manugang ti biktima, idi mapan na ipan ti kanen ken agas ti biktima ket dita a nakita na daytoy a nakadasay iti maysa a sofa a dara-dara.
Iti inisyal nga imbestigasyon, natakuatan dagiti otoridad binagkong mismo ti biktima ti bukod na a bagi, partikular iti paset ti barukong na.
Naitaray met ti biktima iti balay pagagasan ngem naideklara a dead on arrival.
Iti naun-uneg nga imbestigasyon, kuna ni Suitos, rumrumuar a ti biktima ket adda ti immunan a pinangpangta na iti biag na sipud ta daytoy ket agmaymaysa ken naruay dagiti sagsagabaen na a sakit.
Kabayatanna, inpasigurado ni Suitos a maipadalan iti autopsy ti bangkay ti biktima tapno ti kasta ket maikkat dagiti posible nga agam-agam nga adda foul play iti napasamak.
