LAOAG CITY – Natay ti maysa a baket iti Brgy. 1, San Lorenzo ditoy Siudad ti Laoag kalpasan a nauram ti pagtaengan na a nangitunda pay ti pannakauram ti bukud na a bagi iti agarup ala una ti parbangon ita nga aldaw.
Segun ken ni Mrs. Lydia Tungpalan, ti biktima ket ni Lola Josita Bernal, agtawen ti 86 ken agmaymaysa daytoy nga agnanaed iti pagtaengan da gapu ta adda iti ballasiw-taaw dagiti dua nga annak na.
Patien na a ti rason ti uram ket ti nabaybay-an a nakasaksak a a telebisyon.
Inlawlawag na a daytoy ket kalpasan a masansan nga agbuybuya ti telebisyon ti biktima a saan na nga uk-uksuten ti saksakan na.
Kunana a kanayon na a bagbagaan ti biktima nga ikkaten na dagiti nakasaksak a waya tapno maliklikan ti aniaman nga uram ngem saan nga inkankano ti biktima ti pammagbaga kenkuana.
Inbatad na a ti nakakita iti mur-uram a balay ket ti ubing ken dagus met a nagresponde dagiti kameng ti Bureau of Fire Protection ken ti bangkay ti biktima ket nakita iti uneg ti kuarto na.
Kunana a narigatan dagiti nagresponde a kameng ti BFP gapu ta saan da dagus a nakastrek iti uneg ti pagtaengan gapu ta naka-locked wenno nakarikep daytoy rason a binuong ti tawa tapno makastrek dagitoy.
Innayon ni Mrs. Tungpalan nga awanen ti naisalakan pay a ramit ti biktima gapu iti panagramram ti apoy.
Rumrumwar a 3rd agingga iti 4th degree burn ti sinagaba ti biktima gapo iti uram.
Kabayatanna, agtultuloy pay laeng ti naun-uneg nga imbestigasyon ti BFP-Laoag iti napasamak nga uram.
