LAOAG CITY – Natay ti maysa a balikbayan kalpasan a pinalto-paltogan dagiti saan pay a nagbibig a suspek iti Brgy. Aring iti ili ti Badoc.
Ti biktima ket maysa a lalaki, naasawaan ken residente iti nadakamat a barangay.
Segun kenni Police Capt. Elison Pasamonte, ti chief of police iti ili ti Badoc, nakaawat da ti report mainaig iti napasamak a pammaltog iti oras ti alas 4:50 itay malem, Mayo 27.
Inbatad na nga iti inisyal nga imbestigasyon ti Philippine National Police, kabayatan ti panag-walking ti biktima kadwa na ti asawa na ket kellaat lattan a pinalto-pinaltugan dagiti saan pay a nabigbig a suspek.
Inpakaammo ni Pasamonte a nagsagaba ti biktima iti tama ti paltog iti nagduduma a paset ti bagina ken dagos a naitaray iti ospital ngem naideklarar a dead on arrival.
Inlawlawagna a nakarekobre dagiti otoridad ti 3 basyo ti kalibre 45 a paltog iti nakapasamakan ti krimen.
Kunana nga agtultuloy ti imbestigasion dagiti otoridad maipanggep iti motibo iti pammaltog ken pakabigbigan dagiti suspek.
Iti agdama, kuna ni Pasamonte nga addan ti kitkitaen da nga anggulo ken persons of interest da iti napasamak a krimen ngem saan da pay a mabalin nga ipublikar tapno saan a maapektaran ti isaysayangkat da nga imbestigasyon.
Naamoan a ti balikbayan ken ti asawa na ket masansan ti panagbakasyon da ditoy Pilipinas gapu ta nagretiron dagitoy iti trabaho da idiay Hawaii.
