LAOAG CITY – Nabirokan ti maysa a bangkay iti Padsan River iti Brgy. Lapaz ditoy siudad ti Laoag
Nakaawat ti tawag ti City Disaster Risk Reduction and Management Office (CDRRMO) manipud ken ni Brgy. Captain Duldulao no sadinno ket nakita ti maysa a bangkay nga agtatapaw iti Padsan River, paset ti Brgy. 32-B, La Paz, Laoag City.
Apaman ti pannakaawat ti nasao a tawag, kellaat a nagtignay ti City Disaster Risk Reduction and Management Office (CDRRMO) Search and Rescue Team, Medical Team ken kadagiti dadduma pay a kameng ti rescue team nga indauloan ni Dr. Melvin D. Manuel.
Bayat a nakadanon dagiti kameng ti rescue teams, nakipagbinnuligda iti Philippine Coast Guard (PCG), ken ditoyen a narekobre ti maysa a lalaki a bangkay, no sadinno ket nakasuot daytoy ti black striped shirt ken black cargo short.
Ti bangkay ket ineksaminar ni Dra. Janine Ramos ken naipan daytoy iti Philippine National Police (PNP) para iti inisial nga imbestigasion.
Kabayatanna, basar iti nakalap nga impormasion ti Bombo Radyo Laoag a nabigbig a ti bangkay ket ni Herminigildo Gaño a residente ti brgy 9 iti ili ti Sarrat
Rumrumuar nga idi Agosto 28 ket naipasidong daytoy iti Philippine National Police iti ili ti Sarrat gapu iti nalabes a kinabartekna.
Apaman a nakaruar iti kabigatanna ket ditoyen a maipagarup a saanna a kayat ti sumurot kadagiti kameng ti pamilyana a nangsundo kenkuana ken nagtaray daytoy iti karayan ken insawangna a saraken danto lattan iti punerarya ditoy siudad ti Laoag.
Kabayatanna, impasigurado ti City Disaster Risk Reduction and Management Office (CDRRMO) ti napartak a panagrespondeda kadagiti emerhensia aglalo iti mapaspasaran nga agtul-tuloy a panagtudo.
