LAOAG CITY – Natay ti maysa a lalaki kalpasan a pinaltogan na ti ngiwat na iti Brgy. Pila ditoy siudad ti Laoag.
Segun ti imbestigasyon dagiti otoridad, ti biktima ket agtawen ti 18 ken maysa nga estudyante.
Iti report ti PNP Laoag, kalpasan a nangan ti pangrabii ti maseknan a pamilya ket nabaon nga aginnaw ti baro ken kalpasan na ket napan iti kuarto na.
Idi napan kinita ti kabsat na ket dita a naduktalan a nakadasay ti biktima a dara-dara.
Iti panagresponde dagiti otoridad ket narekobre ti maysa a kalibre 9mm a paltog nga addaan ti bala, dua a kalibre 45 a paltog, maysa a magazine ti kalibre 45 nga addaan ti pito a bala, ken maysa a pidaso ti kapsula ti 9mm a bala iti nasao a lugar.
Basar met iti impormasyon a nakalap ti Bombo Radyo, naggapu ti biktima iti maysa a pasdek panganan ken rumrumwar a naipakbo ti maysa a klase ti makan iti uneg ti lugan ti maseknan a pamilya ken maipagarup a naungtang daytoy.
Kabayatanna, agtultuloy pay laeng ti imbestigasyon dagiti otoridad kalpasan ti insidente.
