LAOAG CITY – Natay ti maysa a lalaki kalpasan a nadesgrasya ti nakiluganan na a motorsiklo iti National Highway bisinidad iti Brgy. Suyo iti ili ti Dingras idi rabii.
Nabigbig ti natay a biktima a ni Jaymark Arcanghel y Banoa, agtawen iti 22, baro; idinto a nagsagaba iti sugat ti drayber ti motorsiklo a ni Joel Quadro, agtawen ti 28, baro ken agpada dagitoy a residente iti Brgy. Sulquiano iti nasao nga ili.
Iti imbestigasyon ti PNP, bayat nga agpadpadaya a direksyon ti motorsiklo nga inturong ni Quadro ket adda iti napaspas a limmabas kadakuada isut gapuna a kellaat a inpreno ngem dita a napukawan ti kontrol a nangitunda iti pannakadesgrasya da.
Naitaray a dagus dagiti biktima iti Dingras Memorial Hospital ngem naideklara a dead on arrival ni Arcanghel gapu kadagiti sinagaba na a sugat kangrunaan na iti ulo na idinto a nagsagaba met ti sugat ti nagduduma a ti paset ti bagi na ni Quadro.
Naamoan a nakainum ti nasanger dagiti biktima idi napasamak ti insidente.
