LAOAG CITY – Natay bayat a maag-agasan iti Piddig District Hospital iti ili ti Piddig ti maysa a baro kalpasan a nadesgrasya ti inturong na a motorsiklo iti paset ti Solsona-Piddig Road bisinidad iti Brgy. Juan, Solsona Ilocos Norte.
Binigbig ni Police Executive Master Sergeant Eufemia Maybelle Pascua, ti deputy chief of police iti ili a Solsona, ti biktima a ni Allan Jay Cristobal y Espinosa, agtawen ti 28, baro, helper iti Beatrish Farm Supply, ken residente iti Brgy. Bagbag iti nasao nga ili.
Inbatad ni Pascua nga iti imbestigasyon da, kabayatan ti panagawid ti biktima manipod iti pagubraan na a nakalugan ti Matte Black Yamaha Sniper ket napukawan ti kontrol iti manubela ket naidungpar iti nakaparada a jeep.
Gapu ti kapigsa ti pannakaidungpar ti biktima ket nagsagaba ti sugat iti nagduduma a paset ti bagina kangrunaan iti barukong na.
Naamoan a ti biktima ket awan ti suot na nga helmet idi napasamak ti insidente.
