LAOAG CITY – Nagtalinaed iti kustodyar ti Philippine Drug Enforcement Unit bayat a maisagsagana ti kaso a panagsalungasing ti RA 9165 wenno Comprehensive Dangerous Drugs Act of 2002 ti subject ti drug buy bust operation a naiyuswat iti siudad ti Batac.
Nabigbig ti suspek a ni Yassin Papandayan y Pecpec, agtawen ti 20, baro, helper ken residente iti Brgy.3-Cangrunaan iti siudad ti Batac.
Mainaig iti daytoy, kuna ni PLt. Jackson Sugayen, ti mangidadaulo ti PDEU a ti suspek ket TOP 10 iti Regional Priority List ken Target ti PDEA.
Inbatadna a namunganay ti pannakaarestar ti suspek iti Brgy. Bil-loca kalpasan a naglako ti maipagarup a shabu iti Brgy. Cangrunaan.
Nakumpiskar manipod iti daytoy ti a dua a sachet ti maipagarup a shabu a nausar iti transaksyon, dua a ribo a piso a buy bust money, maysa a plastic sachet a naglaon ti innem a sachet ti maipagaup a shabu, cellphone ken pouch.
Naamoan a mapatta-patta nga agdagup ti 20,000 ti balor ti maipagarup a shabu a nakumpiskar.
Kabayatanna, inbunannag ti ama ti suspek a ni Mr. Salahuddin Papandayan a nu pudno ti akusasyon iti anak na ket masapol a dumalan iti umno proseso.
Innayun na saan nga agus-usar ti iligal a droga ti anakna.
