LAOAG CITY – Kinumpirmaran ni Police Major Eduardo Santos, ti chief of police ti PNP-Pagudpud a naipilan ti kaso a panagtatakaw kontra iti maysa a lalaki.
Nabigbig ti suspek a ni Christian Cabotaje, agtawen ti 20, baro, tubo iti Baranga Namuac, Sanchez Mira, Cagayan ngem agnanaed iti Barangay Poblacion 2 iti ili ti Pagudpud.
Iti imbestigasyon dagiti otoridad, naaktuan a mismo ti agnagan ti Lito Castillo, laborer iti maysa a resort a putputden ti suspek ti agatiddog ti 20 a metro a waya ti generator nga agbalor ti 15 ribo a pisos.
Kunana nga inadmitir pay ti suspek nga addan ti ummuna a tinakaw na a dua a pidaso ti baterya nga agbalor ti walo ribo a pisos iti maysa a pasdek a sakop ti Barangay Burayoc iti nasao met laeng nga ili.
Iti agdama, nagtalinaed ti suspek iti kustudiyar ti PNP-Pagudpud.
