LAOAG CITY – Nagballigi ti inyuswat a search warrant operation dagiti kameng ti Philippine National Police (PNP) iti Sitio Tungel, Barangay Isic-Isic iti ili ti Vintar.
Binigbig ni Police Major Reginaldo Dalipias Jr., ti Chief of Police iti ili ti Vintar ti subject ti operasyon a ni Mr. Elmer Villanueva, addaan iti umno a tawen, mannalon ken residente met laeng iti nasao a barangay.
Segun ken ni Dalipias, naipalaon iti search warrant a biruken dagiti otoridad ti maysa a Caliber 38 ken maysa a 9mm pistol.
Inpakaammo ni Dalipias a kabayatan ti operasyon ket nakarekobre dagiti otoridad ti maysa a caliber 38 a paltog ken dua a bala na.
Gapu iti daytoy, kuna ti opisyal a pinilaan da ti reklamo a panaglabsing iti Republic Act (RA) 10591 wenno illegal possession of firearms and ammunition ti nasao a suspek.
