LAOAG CITY – Natakawan ti maysa a carinderia iti Brgy. 30-B, Sta. Maria ditoy siudad ti Laoag.
Segun ken ni Mr. Joseph Agullana, ti akinkukua ti carinderia, apaman ti panaglukatda iti carinderiada ket nakitada nga agkaiwarang dagiti kagamitanda.
Gapu iti daytoy, inbatadna a dagusda a napan rinebyu ti ala ti nakaimuntar a Close Circuit Television wenno CCTV camera ket ditoy a nakitada ti maysa a lalaki nga agtaktakaw iti carinderiada.
Kunana a naitaray ti agtatakaw ti maysa nga ipad, maysa a selpon, karton ti sigarilio, kuarta nga agbalor ti tallo a ribu a pisos no sadinno nga adda ti pakabuklan a 30 a ribu a pisos a gatad dagiti natakaw.
Inlawlawagna a basar iti ala ti CCTV-da ket namin-adu a daras a pinadas ti suspek a sumrek iti ridaw ti carinderiada agingga a nakastrek met laeng daytoy.
Inpalgakna nga adda ti nabati nga helmet iti carinderiada ngem saanna a masinunuo no kukua daytoy ti agtatakaw.
Innayonna a saanda a malasin ti pakabigbigan ti suspek gapu ta inabbonganna ti rupana ti panyo.
Mainaig iti daytoy, inpakaammo ni Agullana a daytoyen ti maikapat a daras a natakawanda.
Kabayatanna, nangidiaya ni Agullana ti sangapulo a ribu a pisos kas gunggona iti asinoman a makaitudo wenno makaipaay ti naan-anay a detalye ti adda iti likudan ti napasamak a panagtatakaw.
