LAOAG CITY –Inarestar ti Philippine National Police (PNP) iti ili ti Pasuquin, ti maysa a constructiuon worker gapu iti panagtatakaw ditoy siudad ti Laoag.
Segun ken ni P/Maj Jhonvale Maramag, hepe ti Philippine National Police iti ili ti Pasuquin nga agtawen ti 29 ti suspek, construction worker ken residente iti Brgy. Poblacion Tres iti nadakamat nga ili.
Kinunana a naarestar ti suspek babaen iti bileg ti warrant of arrest nga inapruk-at ni Judge Khristy Anne Queja, Branch 1 ditoy siudad.
Gapu iti daytoy, narekomendaran ti suspek a makapagpyansa ti P60,000.00 para iti temporario a pannakawayawaya na.
Nupay kasta, kuna ni Maramag nga ado ti reklamo a naipila iti suspek ken inadmitir ti pamilia ti suspek a karaman daytoy kadagiti kaso ti panagtakaw.
Iti agdama, agtaltalinaed ti suspek iti kuerpo ti pulisya ken manamnama a maiyakar iti Bureau of Jail Management and Penology (BJMP) ditoy siudad ti Laoag.
