LAOAG CITY – Natay ti maysa a lalaki kalpasan a napalto-paltogan iti paset ti Barangay 28, Surong iti ili ti Pasuquin.
Nabigbig ti biktima a ni ROderick Castillo, addaan ti umno a tawen, maysa a construction worker ken residente iti nadakamat a barangay.
Segun kenni Police Lt. Roi Manuel Ordonio, ti chief of police ti PNP-Pasuquin, nakalugan iti motorsiklo ken agawid kuman ti biktima iti pagtaengan da ngem bayat nga adda iti barangay road ket pinalto-paltogan ti saan pay a nabigbig a suspek.
Gapo iti daytoy, nagsagaba ti tama ti paltog iti ulo ti biktima ken maipagarop a natagbat pay ti abaga na.
Inbatad na a ti nangireport iti PNP ket ni Barangay Rosel Eda rason a dagus a nagresponde dagiti otoridad.
Awan met ti narekobre ti PNP ken SOCO a kapsula iti nakapasamakan ti pammaltog.
Kabayatanna, inbinsa-binsa ni Ordonio dagiti posible nga nga anggulo iti napasamak a pammaltog a nakatayan ti biktima a ni Roderick Castillo iti Barangay Surong iti nadakamat nga ili.
Karaman ditoy dagiti nagbalin a rekord na iti barangay da no sadinno a ti naudi a nakariri na ket ti mismo a kabsat na gapo iti isyu ti daga, ti nagbalin a relasyon na kadagiti ummuna a nakadenna na ken agkalkalap da pay ti ad-ado nga impormasyon.
Segun kenni Ordonio, iti inisyal nga imbestigasyon da ummuna a natagbat ti abaga ti biktima no sadinno a naisina ti tangan ti ima na a posible nga isu ti insarapa na idi tagbaten ti suspek.
Kunana a kalpasan daytoy ket mabalin a nakataray ti biktima ken idi nakaadayo agarop 20 a metro manipud iti motorsiklo na ket ditoy a pinalto-paltogan ti suspek.
Nagsagaba ti biktima ti tama ti paltog iti ulo, rupa, iti bagi na ken saka ken ti tangan ti ima na ket nabati iti asideg ti motorsiklo na.
Inbatad a saan da pay nga ammo ti klase ti paltog a nausar iti krimen gapota awna met ti nakita da pakairamanan ti SOCO a basyo iti nakapasamakan ti pammaltog.
Naamoan a ni Castillo ket dati a nabalod agarop 10 a tawenen ti napalabas gapo iti kaso a panagrames.
Awan a pulos ti nakakita iti pasamak gapo ta nasipnget ken putok laengen ti paltog ti nangeg ti maysa a kagawad nga isu ti nangireport kadakuada.
Agtultuloy met ti imbestigasyon dagiti otoridad mainaig iti nasao a pammaltog.
