LAOAG CITY – Pimmusay ti maysa a construction worker nga agtawen ti 18 kalpasan a naaksidente iti naglugananda a kurong-kurong iti Suba-Paoay road iti Brgy. 40 Balatong ditoy ciudad ti Laoag.
Nabigbig ti nagmaneho ti kurong-kurong nga agtawen ti 19, awanan asawa, construction worker, awan ti Driver’s License ken dagti pasahero nga agtawen ti 22, construction worker, ken agtawen ti 18, construction worker, tubo amin manipud iti Cagayan ken agdama nga agnanaed iti Brgy. 37 Calayab ditoy ciudad.
Basar ti imbestigasion nga insayangkat ti Philippine National Police ditoy ciudad ti Laoag, bayat ti panagdaliasat ti nadakamat a kurong-kurong iti abagatan a direksion ket kellat a naisina ti ligay iti sidecar rason a napukaw ti kontrol ti drayber iti steering bar a nakaigapuan ti pannakatnag ti biktima iti sementado ti kalsada.
Gapu iti daytoy nagsagrap ti biktima iti sugat iti nagduduma a paset ti bagi ken ulona no sadinno dagos daytoy a naitaray iti ospital ngem naideklara a dead on arrival babaen iti attending Physician-na bayat a saan a nadangran ti drayber.
Kabayatanna, ti nadakamat a kurong-kurong ket adda iti kustodiar ti Philippine National Police ditoy siudad ti Laoag tapnu maammoan ti cost of repair, para iti dokumentasion ken umno a disposision.
