LAOAG CITY – Nagsagaba ti sugat iti ulo ken ima ti maysa nga indibidual kalpasan a a natagbat iti Barangay 2, Garreta iti ili ti Badoc.
Nabigbig ti biktima a ni Joselito Delos Trino y Calaycay, agtawen ti 50, naasawaan, maysa a driver ken residente iti Barangay Garreta idinto a ti suspek ket ni Eddy Rosete y Palafox aka Jerry Palafox, addaan ti umno a tawen, awanan ti asawa, maysa a caretaker ken agdama nga agnanaed met laeng iti nasao a barangay.
Segun kenni Police Major Joseph Tayaban, ti chief of police ti Philippine National Police iti ili ti Badoc, nagturong ti biktima iti istasyon da ken isu ti nangipakammo a tinagbat isuna ti suspek rason a dagus da met nga intaray daytoy iti Corpus Clinic and Medical Center iti ili ti Sinait, Ilocos Sur.
Inbatad na a basar iti palawag ti biktima, bayat a matmaturog daytoy iti nipa hut a kukua ti Manuel Calaycay ket kellaat lattan a tinagbat isuna ni Palafox ken ti rumrumuar a rason ket ti datin a susik dagitoy.
Dagus met a nangiyuswat ti hot pursuit operation dagiti otoridad ken natiliw da ti suspek iti pagtaengan ti uliteg na a ni Rodrigo Rosete iti Barangay Sta Cruz iti nasao met laeng nga ili.
Kunana a nangiyuswat dagiti kameng ti pulisya ti occular inspection iti nakapasamakan ti insidente ket nadiskubre da ti maysa a fragmentation hand grenade.
Iti agdama, ti suspek ket nagtalinaed iti kustudiyar ti Philippine National Police ken mapilaan ti maiyannatop a kaso.
