LAOAG CITY – Nai-turn over ti maysa a falcon wenno siwawer iti Department of Environment and Natural Resources – Provincial Environment and Natural Resources Office.
Segun ken ni Mr. Victor Dabalos, mangidadaulo iti nasao nga opisina, amin nga ayup a mai-turn over kadakuada ket mai-confine iti opisinada tapno matingiting babaen kadagiti staff-da no adda ti sugatna wenno awan.
Inbatadna a no awan ti sugat ti tumatayab ket maikabil daytoy iti rescue center wenno mangkitada nga insigida ti lugar a pakaiparuk-atanna.
Kunana nga apaman a naikabil ti tumatayab iti treatment cage ket ditoy a nakumpirmaran a maysa daytoy a siwawer a saan met a maibilang nga endangered species.
Inlawlawagna nga adda ti nakitada a tama ti paltog iti akin-kannawan a payak daytoy a mapapati a napaltogan usar ti iskupeta.
Mainaig iti daytoy, inpakaammo ni Dabalos a ti nasao a klase ti tumatayab ket mangan ti piyek a mabalin a rason no apay a napaltogan.
Inpettengna a basar iti linteg ket iligal ti mangdangran ti wildlife animal ngem no dagitoy a wildlife ket mangitunda ti risgo iti biag ti tao wenno mangdadael ti sanikua ket maibilang a saan a mailabsing daytoy iti linteg.
Immuna iti daytoy, nagkamang ti sumagmamano a kameng ti Bureau of Fire Protection iti ili ti Sarrat pakairamanan ni Fire Officer 1 Remar Navarro ditoy Bombo Radyo Laoag tapno i-turn over ti falcon.
Kabayatanna, insigida met nga inpakaammo ken in-turn over ti News Team iti Department of Environment and Natural Resources ti nasao a tumatayab.
